Taolstried
Oet alle oethouken van de gemeinte Tynaorl waren ze der weer op of kommen. Op 10 meert weur de taolstried in ouze gemeinte holden, allemaol organiseerd deur ‘t Huus van de Taol’ oet Beilen. Veurig jaor von de eerste aoflevering plaots in Vreeis en dit maol was der kozen veur café Hingstman in Zayen.
Het succes van de eerste maol hef zijn vruchten aofwörpen. De deilnaome in ’t eerste jaor was al boven verwachting, maor veur dizze oetvoering waren der wel 26 groepen anmeld. De zaol zat dan ok stief vol. Bij ’t Huus van de Taol waren ze weer goud veurberaid op dizze aovend. Abel Darwinkel prissenteerde zuch as de grote leider en dat gung hum weer goud aof. Hij weur baistaon deur een klein leger an keurnoten, en een strenge jury, die vanaof het teneil alles mooi overzein kun. Die jury anvoerd weur deur taolschulte Herma Stroetinga. De resultaoten weurden deur jurylid Aaf (oet Vreeis) allemaol vaastlegd op een klapkompjoeter. Veur ’t naogeslacht dèenk ik.
De Historische Vereniging Oud Vries (Old Vreeis) hef veurig jaor ok al met an daon. Ze binnen toen, niet onverdeinstelijk, op de tweide plaots kommen. Dit maol was het ous lukt om met twei groepen de stried an te gaon. Old Vreeis1 bestun dit maol oet Rita Zuurd, Jan de Jonge, Riek Bos en Gerrit v.d. Werken. Een helder veertal. Ous 2e cluppie mug der ok wezen en kèende de volgende naomen: Bé Weits, Hennie luinge, Luink Luinge en Jan Zuurd.
Der weurden acht ronden speuld met elk weer acht vraogen, dus in totaol 64 vraogen. Wied oet de meeiste vraogen hadden betrekking op de gemeinte Tynaorl. Sport, museums, en van bekend– of minder bekend volk en onderwaarpen, kwamn foto’s langs. Nao èelke ronde gaf Abel even de tussenstand. Het zag der allemaol zo mooi oet veur de pauze. De rangliest weur haost omstebeurt anvoerd deur Old Vreeis 1 en Old Vreeis 2. Nao de ‘rust’ zakte Old Vreeis 2 wat vot. In het tweide deil zag het der al vlot naor oet dat de Brughoezers 2 oet Tynaorl met de eerste pries naor hoes gaon zulden. Oeteindelijk gebeurde dat ok. Old Vreeis 1 en de Dunderboerstrieders weurden gedeild tweide met 46 punten. Old Vreeis 2 belaande op een (gedeilde) veerde plaots met 45 punten. Wij zaten dus weer stoef op mekaor, maor de grootste winst was de gezellighaid van die aovend, met dank an ‘t Huus van de Taol.